అసలే ఎండాకాలం.. పైగా రోళ్లు పగిలే కాలం.. సాధారణ ప్రాంతాల్లోనే వేడి మంటలు పుట్టిస్తోంది.ఇక రాజస్థాన్‌లో మామూలుగానే ఎడారి ప్రాంతం కావడంతో ఎండలు బాగా ఎక్కువ. ఇక సమ్మర్‌లో నిప్పుల కొలిమే అని చెప్పాలి. అలాంటి నిప్పుల కొలిమిలో ఓ సాధువు 41 రోజుల పాటు రోజుకు 4 గంటల పాటు అగ్ని సమిధల ను ఏర్పాటు చేసుకుని వాటి మధ్య కూర్చుని తపస్సు చేస్తున్నాడు. రాజస్థాన్ రాష్ట్రంలోని దౌసా జిల్లాలోని హింగ్వా గ్రామంలోని నాథ్ శాఖకు చెందిన పురాతన సిద్ధపీఠ్ ఆశ్రమంలో విజయనాథ్ యోగి అనే సాధువు ఈ అగ్ని తపస్సు నిర్వహిస్తుండటం విశేషం. ఇంత వేడిలో అంత కఠిన తపస్సు చేస్తున్న సాధువను చూడటానికి భక్తులు పెద్ద ఎత్తున తరలి వస్తున్నారు.
40 ఏళ్లుగా సిద్ధపీఠ్ ఆశ్రమాన్ని నిర్వహిస్తున్న మహంత్ బాబా లక్ష్మణ్ నాథ్ శిష్యుడే విజయనాథ్ యోగి. ఈ నెల 15 నుంచి ఈ తపస్సును ఆయన తపస్సును ఆరంభించారు. వచ్చే నెల 25 వరకూ కొనసాగనుంది. విజయనాథ్ యోగి ఈ తపస్సును తొమ్మిది అగ్ని సమిధల మధ్య కూర్చొని నిర్వహిస్తున్నారు. గత 20 ఏళ్లుగా విజయనాథ్ యోగి ఈ అగ్ని తపస్సు నిర్వహిస్తున్నారట. ఇదంతా లోక కల్యాణార్థమేనని ఆయన చెబుతున్నారు. ఈ తపస్సు మొత్తం మధ్యాహ్న సమయంలో చేస్తున్నారు. ఇంతటి కష్టతరమైన తపస్సును చూసేందుకు జనం భారీగా ఈ ఆశ్రమానికి తరలి వస్తున్నారు. నాథ్ శాఖకు ప్రధాన కేంద్రమైన సిద్ధపీఠ్ ఆశ్రమంలో అనేక మంది సాధువులు, మహాత్ములు నివసిస్తున్నారు.