లింగభైరవి అనేది ఇషా ఫౌండేషన్ వ్యవస్థాపకులు సద్గురు జగ్గి వాసుదేవ్ ప్రాణ ప్రతిష్ఠ చేసిన అత్యంత శక్తివంతమైన దివ్య దేవీ స్వరూపం. తాంత్రిక యోగ శాస్త్రంలో విశేష స్థానం కలిగిన భైరవి దేవి లింగాకారంలో అవతరించడంతో ఆమెను లింగభైరవి అని పిలుస్తారు. తమిళనాడు కోయంబత్తూరు సమీపంలోని ఇషా యోగా కేంద్రంలో ప్రపంచంలోనే ఏకైక లింగభైరవి ఆలయం ఉంది. ఆధ్యాత్మిక సాధకులు, యోగులు, సద్గురు అనుచరులు మాత్రమే కాదు, జీవితంలో భౌతిక, మానసిక, ఆధ్యాత్మిక సమతుల్యత కోరుకునే భక్తులంతా ఆమెను పూజిస్తారు. లింగభైరవి పూజ సరళమైనదైనా అపార శక్తిని ప్రసాదిస్తుంది. భక్తి, శ్రద్ధతో చేసిన సాధన వల్ల ఆరోగ్యం, శాంతి, సంపదతో పాటు అంతర్ముఖ శక్తి వికాసం కలుగుతుందని అనుభవజ్ఞులు చెబుతారు. లింగభైరవి కోరికలు తీర్చే దేవత మాత్రమే కాదు, మనలోని శక్తిని మేల్కొలిపే దివ్య స్వరూపిణి కూడా.
