పూరి జగన్నాథుడి ఆలయంలోని 22 మెట్లను బైసీ పహచా అని పిలుస్తారని తెలుసుకున్నాం కదా. ఈ మెట్లకు సంబంధించిన రహస్యాలు చాలానే ఉన్నాయి. ఈ 22 మెట్లలో మూడవ మెట్టు చాలా డేంజర్. దీని గురించి కొందరికి మాత్రమే తెలుసు. ఈ మూడవ మెట్టును యమ శిల అని పిలుస్తారు. ఆలయంలోకి వెళ్లేటప్పుడు దీనిపై అడుగు పెట్టి వెళ్లవచ్చు. కానీ వచ్చేటప్పుడు మాత్రం ఎట్టి పరిస్థితుల్లోనూ దీనిపై అడుగు మోపకూడదు. పొరపాటున మూడవ మెట్టుపై కాలు పెట్టారో మనిషిలోని సద్గుణాలన్నీ మాయమైపోతాయని చెబుతారు.
ఈ మూడవ మెట్టు వెనుక ఒక ప్రసిద్ధ పురాణ కథ కూడా ఉంది. భక్తులు అంతా జగన్నాథ ఆలయాన్ని సందర్శించి మోక్షాన్ని పొందుతున్నారట. ఆ సమయంలో యమలోకం పూర్తిగా ఖాళీ అయిపోయిందట. అప్పుడు యముడు ఆందోళనతో జగన్నాథుడిని సంప్రదించి తన గోడుని వెళ్లబోసుకున్నాడట. దీంతో జగన్నాథుడు.. ఆలయం నుంచి తిరిగి వచ్చేటప్పుడు ఈ మూడవ మెట్టుపై ఎవరు అడుగు పెడితే వారి సద్గుణాలన్నీ నశించిపోతాయని అప్పుడు వారు పాపాలని లెక్కించవచ్చని చెప్పాడు. అప్పటి నుంచి జగన్నాథుడిని దర్శించుకుని వచ్చేటప్పుడు భక్తులు మూడవ మెట్టుపై అడుగు పెట్టడంపై నిషేధం విధించారు.