అమ్మవారి ఆలయాలు ఎక్కడ ఉన్నా కూడా చాలా శక్తివంతమైనవే. ఏడు శిఖరాల మధ్య ప్రకృతి సౌందర్యంతో అలరారే కొండపై వెలిసిన ఓ అమ్మవారు అత్యంత శక్తివంతురాలిగా పేర్కొంటారు. ఇంతకీ ఎవరా అమ్మవారు? ఆలయ విశేషాలేంటో తెలుసుకుందాం. మహారాష్ట్రలోని నాసిక్ సమీపంలోని ఒక చిన్న గ్రామమైన కల్వాన్ తాలూకాలోని నండూరిలో సప్త శృంగాలపై అమ్మవారు స్వయంభువుగా వెలిసింది. ఈ ఆలయాన్ని సప్తశృంగి ఆలయంగా పేర్కొంటారు. ఈ ప్రాంతంలో నివసించే మరాఠాలు చాలా కాలంగా తమ కులదైవంగా భావించి సప్తశృంగి దేవతను పూజిస్తున్నారు.
కుగ్రామంలో ఉన్నా కూడా ఈ సప్తశృంగి ఆలయం సతీదేవి 52 శక్తి పీఠాల్లో ఒకటిగా విరాజిల్లుతోంది. ఈ ప్రాంతంలో సతీదేవి కుడిచేయి పడిపోయిందని చెబుతారు. మహారాష్ట్రలో మూడున్నర శక్తి పీఠాలున్నాయని దేవీ భాగవతం చెబుతోంది. వాటిలో సప్తశృంగిని సగం శక్తిపీఠం అంటారు. మహారాష్ట్రలోని శక్తి పీఠాలేంటంటే.. కొల్హాపూర్‌లోని మహాలక్ష్మి ఆలయం, తుల్జాపుర్‌లోని తుల్జా భవానీ ఆలయం, మహూర్లోని రేణుకా ఆలయం, వాణిలోని సప్తశృంగి ఆలయం. మహారాష్ట్రలోని ఈ నాలుగు ఆలయాలు పవిత్ర ‘ఓం’ కారం నాలుగు స్వరూపాలైన ‘అ’ కార, ‘ఉ’ కార, ‘మ’ కార, ‘మ్’ కారాలను సూచిస్తాయట.