మాఘ పౌర్ణమి ఎప్పుడో ముందుగా తెలుసుకుందాం. మాఘపూర్ణిమ, మహా మాఘి ఇది విశేష పర్వదినం. స్నానానికి ప్రాముఖ్యమైన మాఘమాసంలో ప్రతి రోజూ సూర్యోదయం ముందు చెయ్యలేని వారు (స్నానం అంటే సూర్యోదయాత్ పూర్వం సభక్తికంగా, విధివిధానంగా చేసే స్నానం) ఈ రోజునైనా చేయాలని ధర్మశాస్త్రోక్తి. ఈ పూర్ణిమ నాడు సముద్రస్నానం విశేషం. తిధుల్లో ఏ పూర్ణిమ అయిన సంపూర్ణంగా దైవీశక్తులు దీవించే పుణ్యతిథే. ఈ తిథి నాడు ఇష్టదేవతారాధన, ధ్యాన జపాది అనుష్టానాలు మహిమాన్వితమైన ఫలాన్ని ఇస్తాయి.
2026లో మాఘ పౌర్ణమి (మాఘీ పూర్ణిమ) ఎప్పుడో కాదు రేపే. అంటే ఫిబ్రవరి 1వ తేదీ, ఆదివారం నాడు మాఘ పౌర్ణమి వచ్చింది. ఈ పవిత్రమైన పౌర్ణమి తిథి ఫిబ్రవరి 1 ఉదయం 5:52 గంటలకు ప్రారంభమవుతుంది. మరుసటి రోజు అంటే ఫిబ్రవరి 2 తెల్లవారుజామున 3:38 గంటలకు ముగుస్తుంది. ఉదయ తిథి ప్రకారం మనం ఏ పండుగనైనా చేసుకుంటాం కాబట్టి ఆదివారం పౌర్ణమి జరుపుకుంటారు. ఈ రోజు సూర్యోదయానికి ముందు సముద్ర స్నానం చేయడం మంచిది. అన్ని పూర్ణిమల్లోకి మఘ, కార్తీక, వైశాఖ మాసాలలో వచ్చే పూర్ణిమలు ఎంతో ఉత్కృష్టమైనవి. వాటిని వ్యర్ధంగా గడుపరాదుని ధర్మశాస్త్రాలు చెబుతున్నాయి.