శ్రీ పద్మావతి శ్రీనివాసుల పరిణయోత్సవాలు ఏప్రిల్ 25 నుంచి అత్యంత వైభవంగా ప్రారంభం కానున్నాయి. ఈ పరిణయోత్సవాలు మూడు రోజుల పాటు అంటే ఏప్రిల్ 27 తేదీ వరకు తిరుమలలో ఘనంగా జరుగనున్నాయి. నారాయణగిరి ఉద్యానవనాల్లోని పరిణయోత్సవ మండపంలో ఈ వేడుకలను అత్యంత వైభవంగా నిర్వహిస్తారు. మూడు రోజుల పాటు జరుగనున్న ఈ వేడుకల్లో తొలిరోజు శ్రీ మలయప్పస్వామివారు గజవాహనం, రెండవరోజు అశ్వవాహనం, చివరి రోజు గరుడవాహనంపై వేంచేపు చేస్తారు.
మరోపక్క ఉభయ నాంచారులు ప్రత్యేక పల్లకీలలో పరిణయోత్సవ మండపానికి వేంచేపు చేస్తారు. ఆ తరువాత కల్యాణమహోత్సవం కన్నుల పండుగగా నిర్వహిస్తారు. దీనికోసం ఇప్పటికే ఆలయ అధికారులు ఏర్పాట్లు నిర్వహిస్తున్నారు. ఎండాకాలం కావడంతో పరిణయోత్సవాలకు హాజరయ్యే భక్తుల కోసం ఎలాంటి ఇబ్బందులూ పడకుండా అన్ని ఏర్పాట్లూ చేస్తున్నారు. ఈ పరిణయోత్సవాల నేపథ్యంలో ఆలయంలో ఆర్జిత సేవలను అధికారులు రద్దు చేయనున్నారు. శ్రీ పద్మావతి పరిణయోత్సవాలు సంద‌ర్భంగా ఏప్రిల్ 25 నుండి 27వ తేదీ వరకు ఆర్జిత బ్రహ్మోత్సవం, సహస్రదీపాలంకార సేవలను టీటీడీ రద్దు చేసింది.