హిందువులు అత్యంత వైభవంగా జరుపుకునే పండుగలలో దసరా లేదంటే విజయదశమి ఒకటి. చెడుపై మంచి గెలిచినందుకు చిహ్నంగా ఈ పండుగను జరుపుకుంటారు. ఈరోజున రావణాసురుడిని రాముడు సంహరించాడని చెబుతారు. అలాగే దుర్గమ్మ మహిషాసుర సంహారం గావించిన రోజు కూడా ఇదేనని చెబుతారు. ఈ రోజున రావణ దహనం కార్యక్రమాన్ని పెద్ద ఎత్తున నిర్వహిస్తారు. ఊరంతా ఒక చోటకు చేరి మరీ రావణ దహనం చేస్తారు. అలాగే ఈ పండుగ నాడు మరో ముఖ్య కార్యక్రమాన్ని సైతం నిర్వహిస్తారు. అదేంటంటే.. జమ్మిచెట్టును పూజించడం.
దసరా పండుగ నాడు జమ్మి చెట్టును పూజిస్తే చాలా మంచిదని చెబుతారు. ఈ జమ్మి పూజకు కేవలం ఆధ్యాత్మికంగానే కాకుండా పురాణాలు, జ్యోతిషశాస్త్రం పరంగా కూడా విశేషమైనదని అంటారు. మహాభారత కాలంలో పాండవులు అజ్ఞాతవాసానికి బయలుదేరినప్పుడు వారు తమ ఆయుధాలన్నింటినీ జమ్మి చెట్టుపై దాచిపెట్టి అజ్ఞాతంలోకి వెళ్లిపోయారు. ఆ తరువాత అజ్ఞాతవాసం ముగిసిన తర్వాత వచ్చి చూసినా కూడా వారి ఆయుధాలు చెక్కుచెదరకుండా ఉన్నాయట. ఫలితంగా జమ్మి చెట్టు శక్తికి, విజయానికి చిహ్నంగా భావిస్తారు. నాటి నుంచే దసరా రోజున జమ్మిచెట్టుతో పాటు ఆయుధ పూజ నిర్వహిస్తారు.