మౌని అమావాస్య మౌనం, దానం, పితృ స్మరణకు అంకితమైన పవిత్ర దినం. మాటలకన్నా మౌనం గొప్ప శక్తి అని గుర్తుచేసే రోజే ఇది. మాఘ మాస అమావాస్యగా పిలువబడే ఈ రోజు, గంగానదిలో స్నానం చేయడం మహాపుణ్యంగా భావిస్తారు. 2026లో మౌని అమావాస్య జనవరి 18న వస్తోంది. ఈ రోజున మౌన వ్రతం పాటిస్తే మనస్సు ప్రశాంతమై, దైవ చింతనకు దగ్గరవుతాం. మాటల వల్ల వృథా అయ్యే శక్తి ఆత్మశుద్ధికి ఉపయోగపడుతుంది. అలాగే ఈ రోజు చేసే దానాలకు అపారమైన ఫలితం ఉంటుంది. నువ్వులు, అన్నం, వస్త్రాలు, దుప్పట్లు దానం చేయడం వల్ల పితృదేవతలు సంతోషిస్తారని విశ్వాసం. పితృ తర్పణాలు చేయడం ద్వారా పితృదోషాలు తొలగిపోతాయి. గంగాస్నానం వీలుకాకపోతే ఇంట్లో గంగాజలంతో స్నానం చేసినా అదే పుణ్యం లభిస్తుంది. మౌనం, దానం, ధ్యానం కలిసిన ఈ అమావాస్య జీవనానికి దివ్యశాంతిని అందిస్తుంది.
