జయశంకర్ భూపాలపల్లి జిల్లాలోని కాళేశ్వరం ముక్తేశ్వర స్వామి క్షేత్రం మహాకుంభాభిషేకానికి ముస్తాబైంది. సుమారు 42 సంవత్సరాల తర్వాత ఈ మహాకుంభాభిషేకం జరుగతోంది. ఈ నేపథ్యంలో పెద్ద ఎత్తున ఏర్పాట్లు చేశారు. నేటి నుంచి మూడు రోజుల పాటు శత చండి మహారుద్ర సహస్ర ఘట్టాభిషేక, కుంబాభిషేక మహోత్సవాలు జరుగనున్నాయి. ఈ కార్యక్రమానికి చాలా ప్రత్యేకత ఉంది. ఈ మహత్తర ఘట్టాన్ని తిలకించేందుకు ఇతర రాష్ట్రాల నుంచి సైతం భక్తులు పెద్ద ఎత్తున తరలి వస్తున్నారు. దీంతో కాళేశ్వరంలో ఆధ్యాత్మిక శోభ ఉట్టిపడుతోంది.
1982లో ముక్తేశ్వర స్వామివారికి మహాకుంభాభిషేకం జరిగింది. ఆ తరువాత తిరిగి మహాకుంభాభిషేకం జరగడం ఇదే తొలిసారి. మూడు రోజుల పాటు స్వామివారికి 1,180 కలశాలతో అభిషేకాలు నిర్వహిస్తారు. ఈ వేడుకల్లో పాల్గొనే భక్తులు కొందరు ముందుగా పుష్కరఘాట్‌లో స్నానమాచరిస్తారు. అనంతరం వచ్చి మహాకుంభాభిషేకంలో పాల్గొంటారు. దీనికోసం ఇప్పటికే ప్రత్యేక ఏర్పాట్లు చేశారు. భక్తులకు ఎలాంటి ఇబ్బంది తలెత్తకుండా చూసుకునేందుకు ప్రత్యేక సిబ్బందిని నియమించారు. పౌర్ణమి రోజున సామూహిక సత్యనారాయణ స్వామిపూజ నిర్వహించనున్నారు.