శ్రీ వేంకటేశ్వర స్వామివారి వజ్ర కవచ పూజను శనివారం నాడు చేస్తే మంచి ఫలితం ఉంటుంది. అది కూడా శ్రీవారి జన్మ నక్షత్రమైన శ్రవణా నక్షత్రంతో కలిసి వచ్చే శనివారం రోజున పూజ చేస్తే మరీ మంచిదట. ఈ రోజున కానీ ఈ పూజ చేస్తే ఫలితం ఊహించలేని విధంగా ఉంటుందట. ఏ సమయంలో ఈ పూజ చేయాలో కూడా తెలుసుకుందాం. శనివారం శుభ హోరలో అంటే ఉదయం 6 గంటల నుండి 8 గంటల మధ్య ఈ పూజ చేయడం సర్వ శ్రేష్టమని చెబుతారు. ఈ పూజ చేసేవారు ముందుగా కలశ స్థాపన చేయాలి. శ్రీ వేంకటేశ్వర స్వామి వారి పటం ముందు ఒక రాగి పాత్రలో నీళ్లు పోసి, అందులో ఒక యాలక్కాయ, ఒక లవంగం, కొద్దిగా పచ్చ కర్పూరం, రెండు తులసి దళాలు వేయాలి.
ఈ వజ్ర కవచ పూజను ‘దీప కవచ పూజ’ అని కూడా అంటారు. ఈ పూజలో దీపారాధనకు ఉన్న ప్రాముఖ్యం వలన ఈ పేరు వచ్చింది. ఒక మట్టి ప్రమిదలో ఆవు నెయ్యి పోసి, ఐదు వత్తులు వేసి దీపాన్ని వెలిగించి, ఈ దీపాన్ని స్వామికి చూపించి, ఈ దీపపు వెలుగులోనే స్వామి వారిని దర్శించాలి. ఈ వెలుగు మన కళ్లలోకి ప్రసరిస్తే దృష్టి దోషాలు తొలగిపోతాయి.
శ్రీవారి పాదాలపై తులసి దళాలు, పసుపు రంగు పూలు, అక్షింతలు వేస్తూ పూజను నిర్వహించాలి. పూజ సమయంలో శ్రీ వెంకటేశ్వర వజ్ర కవచ స్తోత్రాన్ని 3, 5, 9 సార్లు లేదా 11 సార్లు భక్తి శ్రద్ధలతో పఠించాలి. అనంతరం కొబ్బరికాయ కొట్టి, చక్కర పొంగలిని నైవేద్యంగా సమర్పించాలి. అనంతరం కర్పూర నీరాజనం ఇస్తే పూజ పూర్తైనట్టే. కలశంలోని నీటిని తీర్థంగా తీసుకుంటే అనారోగ్య సమస్యలన్నీ దూరమవుతాయి.