తెలంగాణలో మాదిరిగా రాజస్థాన్, గుజరాత్‌లలో కైట్ ఫెస్టివల్ జరుగుతుందని తెలుసుకున్నాం కదా. ఈ సమయంలో ప్రతి చోటా ఆకాశంలో అందంగా ఎగురుతున్న గాలి పటాలను మనం చూడగలం. గుజరాత్, రాజస్థాన్‌లలో అంతర్జాతీయ గాలి పటాల పండుగను నిర్వహించడం జరుగుతోంది. రాజస్థాన్‌లోని జైపూర్‌లోనూ అంతర్జాతీయ ఫిలిం ఫెస్టివల్ చూడవచ్చు. ఈ పండుగ రాజస్థాన్ ప్రజలు అత్యంత వైభవంగా జరుపుకునే పండుగలలో ఒకటి. రంగు రంగుల పతంగాలు ఎగురవేసేందుకు పింక్ సిటీగా పిలుచుకునే జైపూర్‌కు ఇతర దేశాల నుంచి కూడా పెద్ద ఎత్తున పర్యాటకులు వస్తుంటారు.
అసలు ఈ గాలి పటాలను సంక్రాంతి పండుగ సమయంలో ఎందుకు ఎగురవేస్తారో తెలుసుకుందాం. గాలి పటాలను ఎగురవేయడం వెనుక ఒక కథ ఉంది. వాస్తవానికి చలికాలం వచ్చిందంటే జలుబు, దగ్గు వంటి అంటు రోగాలు మనల్ని చుట్టుముడతాయి. ఉత్తరాయణంలో సూర్యుడు సంచరించినప్పుడు ఆ సూర్య కిరణాలు మన శరీరానికి ఔషధంగా పని చేస్తాయి. కాబట్టి ఉదయాన్నే బయటకు వచ్చి సంక్రాంతి నాడు రోజంతా ఎండలో గాలి పటాలను ఎగుర వేస్తారు. అలా ఎగురవేసినప్పుడు శరీరానికి సూర్య కిరణాలు తాకుతాయి. అలా మన శరీరం తిరిగి ఉత్తేజవంతమవుతుంది.