శ్రీ వేంకటేశ్వర స్వామివారి దేవాలయాలు చాలా ప్రదేశాల్లో ఉన్నాయి. అయితే వాటిలో కొన్ని ఆలయాలు చాలా ప్రసిద్ధిగాంచాయి. అలాంటి వెంకన్న ఆలయాల్లో ఒకటి.. చిల్పూరు గుట్ట. ఇది తెలంగాణలోని జనగామ జిల్లాలో ఉంది. ఈ ఆలయంలో శ్రీ వేంకటేశ్వర స్వామివారి విశిష్టత ఏంటంటే.. ఈ స్వామివారికి మొక్కి ఆలయం వద్ద దీపం వెలిగిస్తే చాలు.. రుణ బాధలన్నీ తీరిపోతాయట. అందుకే ఆయనను “అప్పులు తీర్చే వెంకటేశ్వరుడు” లేదా “బుగులు వెంకటేశ్వర స్వామి”గా భక్తులు పిలుస్తారు.. ఈ స్వామిని దర్శిస్తే రుణ బాధలన్నీ తీరిపోయి ప్రశాంతంగా జీవిస్తారట.
ఇక్కడికి వచ్చిన వారంతా రుణ విమోచన దీపాన్ని వెలగిస్తారు. ఇదే ఆర్థిక సమస్యల నుంచి గట్టెక్కిస్తుందట. చిల్పూరు గుట్ట ఆలయంలో ఒక అఖండ దీపం ఉంటుంది. ఇక్కడకు వచ్చిన భక్తులు ఈ దీపంలో నూనె పోసి వెలిగిస్తే రుణ బాధలు తీరుతాయని భక్తులు నమ్ముతారు. అయితే రుణ బాధలన్నీ తీరిపోయిన తర్వాత భక్తులు తిరిగి ఈ ఆలయానికి వచ్చి మొక్కులు చెల్లించుకుంటారు. ముఖ్యంగా శుక్రవారం నాడు ఇక్కడి వేంకటేశ్వర స్వామికి అభిషేకం నిర్వహిస్తారు. ఈ అభిషేకంలో పాల్గొన్నా చాలు.. మానసిక ప్రశాంతత చేకూరుతుందని నమ్మకం. ఇక శనివారం కూడా ఈ ఆలయంలో ప్రత్యేక పూజ నిర్వహిస్తారు. దానిలో పాల్గొంటే సకల బాధలూ తొలగిపోతాయని చెబుతారు.