గంగా దసరా గురించి చాలా మందికి తెలిసి ఉండదు. హిందూ పంచాంగం ప్రకారం ప్రతి సంవత్సరం వైశాఖ మాసంలోని శుక్ల పక్షంలోని పదవ రోజున గంగా దసరాను జరుపుకుంటాం. ఇక గంగా దసరా పేరులోనే ఉంది కదా.. ఈ రోజున గంగామాతను పూజిస్తాం. గంగమ్మ ప్రకారం వైశాఖ మాసంలోని శుక్ల పక్షంలోని పదవ రోజున భూమిపై ఉద్భవించింది. కాబట్టి ఆ రోజును మనం గంగా దసరాగా జరుపుకుంటాం. ఈ రోజున గంగానదిలో స్నానమాచరిస్తే మనం చేసిన పాపాలన్నీ తొలగిపోతాయని నమ్మకం. ఈ ఏడాది గంగా దసరా ఎప్పుడంటారా? జూన్ 16వ తేదీన. క్యాలెండర్ ప్రకారమైతే మాసం శుక్ల పక్ష దశమి తిథి జూన్ 16 మధ్యాహ్నం 2:32 గంటలకు ప్రారంభమై జూన్ 17 ఉదయం 4:45 గంటలకు ముగుస్తుంది. కాబట్టి జూన్ 16ను గంగా దసరాగా జరుపుకుంటాం.
అయితే గంగ స్నానం ఎప్పుడు చేస్తే ఫలితం మరింత బాగుంటుందంటే.. జూన్ 16న ఉదయం 4:03 నుంచి 4:45 వరకు బ్రహ్మ ముహూర్తం ఉంటుంది. అంతేకాకుండా ఈ రోజున రవియోగం, సర్వార్థ సిద్ధి యోగం, అమృత సిద్ధి యోగం కూడా ఏర్పడుతుండటం మరింత కలిసొచ్చే అంశాలు. ఈ యోగాలు.. పూజకు, స్నానానికి, దానానికి అత్యంత ప్రీతికరమైన సమయంగా పరిగణించబడుతున్నాయి. గంగా దసరా నాడు తెల్లవారుజామునే నిద్ర లేచి స్నానం చేయాలి. నది వద్ద స్నానం చేసే వీలు లేని వారు ఇంటి వద్ద అయినా గంగా జలం కలిపిన నీటితో స్నానం చేయండి. ఆ తరువాత సూర్య భగవానుడికి అర్ఘ్యం సమర్పించి అనంతరం గంగాదేవి, శివుడిని పూజించాలి. ఆపై గంగా స్తోత్రాన్ని పఠించి, చివరగా గంగాదేవికి హారతి ఇస్తే పూజ సంపూర్ణంగా ముగిసినట్టే.