నేటి నుంచి ఉత్తర ఫల్గుని కార్తె ప్రారంభం కానుంది. భారతీయ జ్యోతిష్య సాంప్రదాయం ప్రకారం ప్రతి కార్తె ప్రకృతిలో వచ్చే మార్పులను సూచిస్తుంది. ఋషులు తమ పరిశోధనల ద్వారా ఈ మార్పులను గ్రహించి, శాస్త్ర రూపంలో వివరించారు. రైతులు, గ్రామీణ ప్రజలు పంటలు వేసే సమయాన్ని, వర్షాభావం లేదా వర్షప్రవృత్తిని ఈ కార్తెల ఆధారంగా నిర్ణయించుకుంటూ వస్తున్నారు. సూర్యుడు ఉత్తర ఫల్గుని నక్షత్రంలో ప్రవేశించే రోజు నుండే ఉత్తర కార్తెగా పిలుస్తారు.
పంచాంగ ఆధారంగా: ఉత్తర ఫల్గుని నక్షత్రంలో సూర్యుడు ప్రవేశించే సమయానికీ తిథి, వారం, నక్షత్రం, యోగం, కరణం, శకునాలు మొదలైన అంశాలను పరిశీలించి ఆ సంవత్సరం వర్షాభావం, వాతావరణ స్థితిలను నిర్ణయిస్తారు. ఈ విధంగా వ్యవసాయ మార్గదర్శనం ఈ కార్తెలలో దాగి ఉంటుంది.
కార్తె అంటే ఏమిటి?
చంద్రుడు ఒక్కో నక్షత్ర సమీపంలో 14 రోజులపాటు సంచరిస్తాడు. ఆ సమయంలో ఆ నక్షత్రం పేరు మీదే ఆ కార్తె పేరు ఏర్పడుతుంది. అశ్వినితో మొదలై రేవతితో ముగిసే వరకు మొత్తం 27 కార్తెలు ఉంటాయి. ప్రస్తుతం చంద్రుడు ఉత్తర ఫల్గుని నక్షత్రం సమీపంలో ఉండటంతో దీనిని ఉత్తర ఫల్గుని కార్తె అంటారు. కార్తెలను ఆధారంగా చేసుకొని రైతులు పంటల విత్తనాలు, పండించే విధానం, వర్షం వచ్చే సమయాన్ని అంచనా వేసుకుంటారు.
పూర్వం నుంచి ఈ విధానం రైతులకు సహజ కాలగణనగా మారింది. వర్షం, గాలి, వాతావరణం.. అన్నీ ఈ కార్తెలతో ముడిపడి ఉన్నాయని నమ్మకం.