తెలంగాణలో బతుకమ్మ సందడి నిన్ననే ప్రారంభమైంది. ఊరు, వాడ అంతటా బతుకమ్మ సంబరాలు అంబరాన్నంటాయి. ఈ క్రమంలోనే ఓ భారీ బతుకమ్మ రాష్ట్ర వ్యాప్తంగా హాట్ టాపిక్గా మారింది. గతంలో అతి పెద్ద బతుకమ్మ రికార్డ్ను బ్రేక్ చేస్తూ ఓ పాఠశాల ప్రపంచంలోనే అతి పెద్ద బతుకమ్మను తయారు చేసింది. జనగామ జిల్లా కేంద్రంలోని సెయింట్ మేరీస్ పాఠశాలలో ముందస్తుగా మంగళవారం బతుకమ్మ సంబరాలు పెద్ద ఎత్తున నిర్వహించారు. పాఠశాల విద్యార్థులు, ఉపాధ్యాయులు కలిసి 36.2 అడుగుల భారీ బతుకమ్మను పేర్చారు. ఈ బతుకమ్మ ప్రత్యేక ఆకర్షణగా నిలుస్తోంది.
ఈ బతుకమ్మను పేర్చడంలో 700 మంది విద్యార్థులు, ఉపాధ్యాయులు పాల్గొన్నారు. ఒక రోజంతా శ్రమించి 36.2 అడుగులతో భారీ బతుకమ్మను తయారు చేశారు. అనంతరం ఈ బతుకమ్మ వద్ద ఆటపాటలతో సందడిగా సంబరాలు నిర్వహించారు. గతంలో 31 అడుగుల బతుకమ్మ వండర్ బుక్ ఆఫ్ రికార్డులో చోటు సంపాదించుకుంది. ఈ ఏడాది 36.2 అడుగుల బతుకమ్మను తయారు చేసి సెయింట్ మేరీస్ పాఠశాల రికార్డును బ్రేక్ చేసింది. పాఠశాల యాజమాన్యానికి వండర్ బుక్ ఆఫ్ రికార్డు ప్రతినిధులు సర్టిఫికెట్ ను అందించి సన్మానించారు.