భవానీ దీక్ష అనేది విజయవాడలోని ఇంద్రకీలాద్రిపై కొలువైన కనకదుర్గ అమ్మవారి భక్తులు పాటించే ఒక పవిత్రమైన వ్రతం లేదా నియమనిష్ఠలతో కూడిన దీక్ష. శబరిమల అయ్యప్ప దీక్షల మాదిరిగానే భవానీ దీక్షలకు కూడా అత్యంత ప్రాధాన్యత ఉంది. ప్రతి సంవత్సరం కార్తిక మాసంలో లక్షలాది మంది భక్తులు ఈ దీక్షలను చేపడతారు. కార్తిక పౌర్ణమి, ఉత్థాన ఏకాదశి వంటి శుభ దినాలలో గురుస్వాముల ద్వారా భక్తులు దీక్షా మాలను ధరిస్తారు. దీక్షా కాలంలో ఎరుపు లేదా కాషాయ రంగు వస్త్రాలను మాత్రమే ధరిస్తారు. ఈ వస్త్రాలు స్వచ్ఛతకు, భక్తికి ప్రతీక.
భవానీ దీక్షా సమయంలో పాటించాల్సిన నియమాలు ఇప్పుడు మనం తెలుసుకుందాం. ప్రతిరోజూ ఉదయాన్నే చన్నీటితో స్నానం చేసి, శుభ్రంగా ఉంటారు. సాత్విక ఆహారాన్ని మాత్రమే తీసుకుంటారు. మాంసాహారం, ఉల్లి, వెల్లుల్లి వంటివి పూర్తిగా త్యజిస్తారు. ఈ కాలంలో క్షవరం చేయించుకోవడం, గోర్లు తీయడం వంటి వాటికి దూరంగా ఉంటారు. ప్రతిరోజూ దుర్గమ్మను ప్రత్యేకంగా పూజిస్తారు. అమ్మవారి స్తోత్రాలు పఠిస్తారు. నేలపైనే నిద్రించడం ఒక నియమం. సాధారణంగా ఈ దీక్ష 41 రోజులు (మండల దీక్ష) లేదా 21 రోజులు (అర్థమండల దీక్ష) ఉంటుంది. కొంతమంది భక్తులు 108 రోజుల పాటు కూడా దీక్ష చేస్తారు. దీక్షా కాలం ముగిశాక, భక్తులు ఇంద్రకీలాద్రికి చేరుకుని, ఇరుముడి సమర్పించి, పవిత్ర కృష్ణానదిలో స్నానం చేసి దీక్ష విరమిస్తారు. మరింత విలువైన ఆధ్యాత్మిక సమాచారం కోసం Bhakthi TV ని Subscribe చేసుకోండి.
