ఇవాళ ఇంద్రకీలాద్రిపై శ్రీ మహా చండీ దేవిగా దుర్గమ్మ..

చండీదేవి.. కాళీదేవిని పోలి ఉంటుంది. శాంతస్వరూపంలో ఉన్నప్పుడు ఉమా, గౌరీ, పార్వతి, హైమవతి, శతాక్షి, శాకంభరి, అన్నపూర్ణ, జగన్మాత, భవాని అనే నామాలతో పిలుస్తారు. ఉగ్రరూపంలో దర్శనమిస్తే ఆమెను దుర్గ, కాళి, శ్యామ, చండీ, భైరవి, చిన్నమాస్త అనే పేర్లతో ఆరాధిస్తారు. నవరాత్రుల్లో ప్రత్యేకంగా చండీదేవి పూజ చేయడం అత్యంత పవిత్రం.

చండీ దేవి అవతరణం

పురాణాల ప్రకారం, రాక్షసులు ఇంద్రసింహాసనాన్ని చేజిక్కించుకున్నప్పుడు దేవతలు శివుని శరణు కోరారు. శివుడి ఆజ్ఞతో, దేవతల ఆరాధన ఫలితంగా సరస్వతి, లక్ష్మి, మహాకాళ.. ఈ మూడు శక్తులు కలసి చండీ స్వరూపం ధరించి రాక్షసులను సంహరించాయి.

చండీ దేవి ఆలయం

హరిద్వార్ సమీపంలోని నీల పర్వత శిఖరంపై చండీదేవి ఆలయం ఉంది. రాక్షసులను సంహరించిన తరువాత అమ్మవారు ఇక్కడే స్థిరపడిందని చెబుతారు. ఇది ప్రఖ్యాత శక్తి పీఠాలలో ఒకటి. ఆలయ విగ్రహాన్ని ఆదిశంకరాచార్యులు 8వ శతాబ్దంలో ప్రతిష్టించారన్న విశ్వాసం ఉంది. నవరాత్రుల్లో అష్టమి, నవమి, చతుర్థి రోజులు ప్రత్యేక పూజలతో భక్తులకు మహాభాగ్యాన్ని ప్రసాదిస్తాయి. 1929లో కాశ్మీర్ రాజు సుచేత్ సింగ్ తన కోరిక నెరవేరినందుకు ఆలయాన్ని పునరుద్ధరించాడు. ఈ విధంగా పూజలో పాల్గొన్న ప్రతి భక్తుడు చండీదేవి కరుణానుగ్రహానికి పాత్రుడవుతాడని చెబుతారు.