అప్పలాయగుంట శ్రీ ప్రసన్న వేంకటేశ్వర స్వామి ఆలయంలో తొమ్మిది రోజుల పాటు జరిగిన వార్షిక బ్రహ్మోత్సవాలు అంగరంగ వైభవంగా నిర్వహించారు. అర్చకులు, వేదపండితుల మంత్రోచ్ఛారణల నడుమ ఆలయమంతా ఆధ్యాత్మిక వాతావరణంతో నిండిపోయింది. ఉదయం, సాయంత్రం వాహన సేవలతో శ్రీ ప్రసన్న వేంకటేశ్వర స్వామివారు పులకించి పోయారు. పెద్ద ఎత్తున భక్తులు ఈ బ్రహ్మోత్సవాలకు హాజరయ్యారు. తిరుమల తిరుపతి దేవస్థానం సైతం తమ వంతుగా భక్తులకు ఎలాంటి ఇబ్బందీ లేకుండా ఏర్పాట్లు చేసింది. మొత్తానికి ఆదివారం రాత్రి ధ్వజావరోహణంతో ముగిశాయి.
రాత్రి 7.00 – 07.30 గంటలకు ధ్వజావరోహణ ఘట్టం నిర్వహించారు. గరుడ పటాన్ని అవనతం చేసి ధ్వజారోహణం నాడు ఆహ్వానించిన సకల దేవతలను సాగనంపారు. దీంతో శ్రీ ప్రసన్న వేంకటేశ్వరస్వామి బ్రహ్మోత్సవాలు ముగిశాయి. బ్రహ్మోత్సవాలలో పాలు పంచుకునే వారు సమస్త పాపవిముక్తులై, ధనధాన్య సమృద్ధితో తులతూగుతారని ఐతిహ్యం. వాహన సేవలో టీటీడీ డిప్యూటీ ఈవో శ్రీ హరీంధ్రనాథ్, ఏఈవో శ్రీ దేవరాజులు, సూపరింటెండెంట్‌ శ్రీమతి శ్రీవాణి, టెంపుల్‌ ఇన్‌స్పెక్టర్ శ్రీ శివకుమార్, అర్చకులు, శ్రీవారి సేవకులు, పెద్ద ఎత్తున భక్తులు పాల్గొన్నారు.