మార్చిలో శ్రీ గోవిందరాజస్వామివారి ఆలయంలో విశేష ఉత్సవాలు

తిరుపతి శ్రీ గోవిందరాజస్వామివారి ఆలయంలో మార్చి నెలలో పలు విశేష ఉత్సవాలు జరుగనున్నాయి. వాటి వివరాలు ఇలా ఉన్నాయి. మార్చి 6న రోహిణి నక్షత్రాన్ని పురస్కరించుకుని సాయంత్రం 5.30 గంటలకు రుక్మిణి, సత్యభామ సమేత శ్రీ పార్థసారధిస్వామివారు ఆలయ నాలుగు మాడ వీధుల్లో విహరించి భక్తులకు అభయమిస్తారు. మార్చి 7, 21, 28వ తేదీల్లో శుక్రవారం నాడు సాయంత్రం 6 గంట‌ల‌కు శ్రీ ఆండాళ్‌ అమ్మవారు ఆలయ మాడవీధుల్లో భక్తులకు దర్శనమిస్తారు.

మార్చి 14న పౌర్ణమి సందర్భంగా స్వామివారు గరుడ వాహనంపై విహరిస్తారు. మార్చి 25న శ్రవణ నక్షత్రాన్ని పురస్కరించుకుని సాయంత్రం 6 గంటలకు శ్రీదేవి, భూదేవి సమేత శ్రీకల్యాణ వేంకటేశ్వరస్వామివారు ఆలయ నాలుగు మాడ వీధుల్లో విహరించి భక్తులను అనుగ్ర‌హించ‌నున్నారు. మార్చి 27న శ్రీ గోవింద‌రాజ‌స్వామివారి ఆల‌యంలో ఉగాది సంద‌ర్భంగా కోయిల్ ఆళ్వార్ తిరుమంజ‌నం నిర్వహించనున్నారు. అనంతరం మార్చి 30న శ్రీ గోవిందరాజ స్వామివారి ఆల‌యంలో ఉగాది ఆస్థానం జరుపనున్నారు.