చంద్రగిరి శ్రీ కోదండరామస్వామి ఆలయంలో మూడు రోజుల పాటు జరిగిన పవిత్రోత్సవాలు గురువారం ఘనంగా ముగిశాయి. ఇందులో భాగంగా ఉదయం 5.30 నుండి 6 గంటల వరకు స్వామివారిని సుప్రభాతంతో మేల్కొలిపి సహస్రనామార్చన, నిత్యార్చన నిర్వహించారు. ఉదయం 8.30 నుంచి మధ్యాహ్నం 11 గంట వరకు ద్వారాతోరణ, ధ్వజకుంభారాధన, చతుష్టార్చన, మూర్తిహోమం, శాంతిహోమం, మహా పూర్ణాహుతి, పవిత్ర వితరణ, వేదశాత్ మొర కార్యక్రమాలు నిర్వహించారు.
అనంతరం ఉదయం 11 నుంచి 11.45 గంటల వరకు శ్రీ సీతారామ లక్ష్మణ సమేత హనుమంతస్వామివారు, శ్రీ సుదర్శన చక్రతాళ్వార్‌లకు స్నపనతిరుమంజనం వేడుకగా జరిగింది. ఇందులో పాలు, పెరుగు, తేనె, కొబ్బరినీళ్లు, పసుపు, చందనంతో స్వామి, అమ్మవారి ఉత్సవమూర్తులకు అభిషేకం చేశారు. అనంతరం చక్రతాళ్వార్‌కు చక్రస్నానం ఘనంగా నిర్వహించారు. సాయంత్రం 6 నుండి 6.30 గంటల వరకు తిరుచ్చిపై శ్రీ సీతా లక్ష్మణ సమేత శ్రీ కోదండరామ స్వామివారు విహ‌రించి భ‌క్తుల‌ను క‌టాక్షిస్తారు. ఈ కార్యక్రమంలో ఆలయ డిప్యూటీ ఈవో శ్రీ దేవేంద్రబాబు, ఏఈఓ శ్రీ సుబ్బరాజు, సూపరింటెండెంట్ శ్రీ జ్ఞాన ప్రకాష్, టెంపుల్‌ ఇన్‌స్పెక్టర్‌ శ్రీ ముని హ‌రిబాబు, ఇతర అధికారులు, విశేష సంఖ్యలో భక్తులు పాల్గొన్నారు.