అమ్మవారి శక్తి దేశాల సరిహద్దులను దాటుతుందని చాటిచెప్పే పవిత్ర క్షేత్రాలే బంగ్లాదేశ్లోని శక్తిపీఠాలు. సనాతన ధర్మంలో అమ్మవారిని జగన్మాతగా, శక్తి స్వరూపంగా ఆరాధిస్తారు. సతీదేవి శరీర భాగాలు పడిన ప్రదేశాలే శక్తిపీఠాలుగా ప్రసిద్ధి చెందాయి. అలాంటి విశిష్టమైన ఏడు శక్తిపీఠాలు, ఒక మహాశక్తి ఆలయం బంగ్లాదేశ్లో ఉండటం భక్తులు మహా వరంగా భావిస్తారు. సత్ఖిరాలోని జెస్సోరేశ్వరీ శక్తిపీఠంలో కాళీదేవి ఉగ్రరూపంలో దర్శనమిస్తే, నది ఒడ్డున ఉన్న సుగంధ శక్తిపీఠంలో తారాదేవి కరుణను ప్రసాదిస్తుంది. చంద్రనాథ్ పర్వతంపై కొలువైన చట్టల్ మా భవానీ దుర్గాశక్తికి ప్రతీక. సిల్హెట్లోని జయంతి శక్తిపీఠం ధైర్యాన్ని ఇస్తుంది. అదే జిల్లాలోని మహాలక్ష్మీ శక్తిపీఠం ఐశ్వర్యానికి నిలయం. చిట్టగాంగ్లోని శ్రావణి శక్తిపీఠం ఆధ్యాత్మిక చైతన్యాన్ని కలిగిస్తే, షేర్పూర్ జిల్లాలోని అపర్ణ శక్తిపీఠం అమ్మ పాదాల దర్శనంతో మోక్ష మార్గాన్ని చూపుతుందని నమ్మకం. ఇవన్నీ కాకుండా, బంగ్లాదేశ్ రాజధాని ఢాకాలోని ఢాకేశ్వరీ ఆలయం అమ్మవారి శక్తికి ప్రధాన కేంద్రమని విశ్వాసం. ఈ ఆలయమే ఢాకా నగరానికి నామకరణానికి కారణమని చెబుతారు. ఈ శక్తిపీఠాల దర్శనం మనసుకు శాంతిని, జీవితానికి దిశను చూపుతుందని భక్తుల అచంచల విశ్వాసం.
